A preparación para a liberdade e a reinserción social foi a temática escollida para a terceira edición das Xornadas da Rede Galega de Educacións en Prisión que este xoves se celebraron no campus de Ourense. A cita, co-organizada pola Facultade de Educación e Traballo Social da UVigo, contou coa asistencia de arredor de 90 profesionais e alumnado das tres universidades públicas galegas. Nelas houbo conferencias, obradoiros e mesas de experiencias para debater e avanzar sobre o papel da educación nos procesos de reinserción.
A Rede Galega de Educación en Prisión (Regaep) é unha rede constituída en 2021 que agrupa a entidades sociais e académicas que traballan no ámbito socioeducativo con persoas privadas de liberdade nos cinco centros penintenciarios e nos dous centros de inserción social de Galicia. As súas xornadas, nas que colaboran diferentes entidades relacionadas co sector (algunhas delas tamén membros da propia rede) e as tres universidades públicas galegas, constitúen un punto de encontro periódico no que diferentes actores poden expor as súas experiencias, traballos e coñecementos, dialogar entre eles e contribuír ao avance neste eido.
O Ministerio de Sanidade entregou este xoves en Madrid ao profesor da Universidade de Vigo Manuel Isorna a Cruz Branca da Orde ao Mérito do Plan Nacional sobre Drogas. O galardón supón, tal e como indica o homenaxeado, un respaldo explícito á súa dilatada traxectoria de investigación científica orientada á transferencia social neste eido.
As condecoracións da Orde ao Mérito do Plan Nacional sobre Drogas, reguladas por Real Decreto, son outorgadas anualmente pola Delegación do Goberno para o Plan Nacional sobre Drogas co fin de recoñecer publicamente o labor de persoas e institucións que destacaron polo seu esforzo, dedicación e achegas extraordinarias na prevención, o tratamento, a rehabilitación e o control das adiccións. Con este distintivo, o estado visibiliza aquelas traxectorias que, desde a investigación, a práctica clínica, o traballo comunitario ou o labor policial e xudicial, contribúen de maneira decisiva a protexer a saúde pública e o benestar social fronte aos riscos do consumo de substancias e as adiccións comportamentais.
Medo me dá! Ler para esconxurar as sombras. Este é o lema dunha nova edición Ciclo de Literatura Infantil e Xuvenil que este mes de outubro acollerá a Facultade de Educación e Traballo Social. Ao longo de catro sesións, as e os escritores Paula Carballeira, Xosé Miranda, Ramón D. Veiga e Fina Casalderrey falarán no campus de Ourense da literatura como ferramenta para, desde o humor, axudar a nenas e nenos a afrontar os medos, as inseguridades e as incertezas da vida.
A actividade está organiza polas profesoras do centro Isabel Mociño, Carla Míguez, María Cerdeira e María Vázquez. Conta co apoio da Vicerreitoría do Campus de Ourense e do Campus Auga (proxecto de especialización financiado pola Xunta de Galicia); da Facultade de Educación e Traballo Social e da Asociación de Escritoras e Escritores en Lingua, colaborando esta última ao abeiro do convenio que ten coa Secretaría Xeral de Política Lingüística da Xunta de Galicia.
O ciclo mantén o seu obxectivo inicial de ofrecer unha actividade formativa que complemente o currículo formativo das futuras mestras e mestres que se forman na Facultade de Educación e Traballo Social da UVigo, propiciando o seu contacto directo con creadoras e creadores en lingua galega. As sesións celebraranse cada xoves do mes de outubro, sempre ás 18.00 h, na sala Emilia Pardo Bazán do Edificio de Ferro. A inscrición é de balde e está en trámite o recoñecemento de 15 horas de créditos de libre elección. Aínda que especialmente pensada para o alumnado dos graos de Educación Infantil e de Educación Primaria que se imparten no campus, a iniciativa está tamén aberta a outros colectivos e públicos que poidan estar interesados, como poden ser mestras e metres en activo.
A Facultade de Educación e Traballo Social do campus de Ourense e o Colexio de Educadoras e Educadores Sociais de Galicia presentaron este martes o novo Programa de mentoría investigadora de profesorado universitario xubilado con profesionais da educación social. A iniciativa busca activar unha rede baseada na colaboración interxeracional e na transferencia de coñecemento para avanzar no corpus teórico desta profesión.
A presentación contou coa participación de Montserrat Cruz, vicerreitora do campus de Ourense; Isabel Mociño e Deibe Fernández Simo, decana e vicedecano respectivamente da Facultade de Educación e Traballo Social, e Sonia González, presidenta do Colexio Profesional de Educadoras e Educadores Sociais de Galicia. No acto, a vicerreitora subliñou os beneficios da mentoría e amosou o seu desexo de que esta iniciativa sexa un éxito que se poida replicar e escalar noutros centros do campus. Pola súa banda, Isabel Mociño indicou que a actividade forma parte do compromiso estratéxico da facultade de conexión coa contorna e apuntou que o programa nace tanto do respecto ao talento forxado nas aulas universitarias como da necesidade de xerar coñecemento entre a academia e a profesión, neste caso desde o “acompañamento, o respecto a aprendizaxe mutua” no ámbito da educación social.
Desde a Facultade de Educación e Traballo Social do campus de Ourense están a desenvolverse dous proxectos de investigación centrados no papel da literatura infantil nas aulas de Educación Infantil da provincia de Ourense. Dirixidos polas profesoras da UVigo Carla Míguez e Nazaret Blanco, centran o seu interese nas seleccións e prácticas lectoras do profesorado, a mediación lectora, o fomento da lingua galega e a educación en igualdade, diversidade e perspectiva de xénero.
Un dos proxectos titúlase Construíndo lectores dende a infancia: seleccións e prácticas lectoras dos docentes de Educación Infantil na provincia de Ourense e está coordinado por Carla Míguez, do grupo Reflexión, Innovación, Transferencia e Mellora Educativa (RITME). “Este proxecto pretende realizar entrevistas con profesorado desta etapa para coñecer que obras empregan nas súas aulas, con que finalidades pedagóxicas se utilizan, que prácticas lectoras desenvolven e en que medida estas seleccións favorecen o contacto coa lingua galega”, explica a responsable da iniciativa. Ademais, recollerase información relativa ao contexto do seu centro educativo e ao seu perfil docente, incluíndo a súa formación previa en literatura infantil e mediación lectora, os hábitos lectores persoais, e as percepcións sobre a lingua galega, co obxecto de analizar en que medida estas variables condicionan as súas prácticas e seleccións lectoras.
Un ano máis, desde a Facultade de Educación e Traballo Social do campus de Ourense e o Colexio Profesional de Educadores e Educadoras Socias de Galicia (CEESG) estase a organizar V Seminario Internacional de Educación Social do Xurés e a V Convivencia Profesional e Interuniversitaria. As citas, que terán lugar do 25, 26 e 27 de setembro como actividades previas ao Festival Xurés Son, reunirán no Concello de Lobios a arredor de 250 estudantes e profesionais do ámbito da educación social e áreas afíns co obxectivo de afondar en temas de interese e actualidade neste eido.
A edición deste ano foi presentada este luns por Isabel Mociño, decana da Facultade de Educación e Traballo Social; María del Carmen Yáñez, alcaldesa de Lobios; e Deibe Fernández Simo, responsable do comité organizador das actividades. As iniciativas, indicouse, están promovidas polo Colexio Profesional de Educadores e Educadoras Socias de Galicia (CEESG), coordinadas pola Facultade de Educación e Traballo Social do campus e patrocinadas polo Concello de Lobios, a Vicerreitoría do campus de Ourense e a Xunta de Galicia.