Desde o ano 2018, a Área de Antropoloxía Social da Universidade de Vigo traballa nun proxecto de investigación sobre os espazos museísticos locais en colaboración co Centro Xaquín Lourenzo de Cultura Popular, da Deputación de Ourense. Este curso académico, alumnado do Grao de Traballo Social do campus de Ourense uniuse a esta iniciativa facendo as súas propias achegas de análise do labor dos museos e da súa vinculación coa comunidade.
Arredor de 70 estudantes de primeiro curso deste grao, que se imparte na Facultade de Educación e Traballo Social, participaron no proxecto no marco da materia de Antropoloxía Social e Cultural, impartida pola antropóloga Fátima Braña. A súa participación, cun enfoque de experiencia de aprendizaxe-servizo á comunidade, partiu do traballo en aula arredor de conceptos básicos do proxecto (como museos, sociomuseoloxía, patrimonio cultural, inclusión e participación da comunidade) e co deseño de instrumentos para a recollida de datos, apostando polo sociograma como ferramenta para o coñecemento das e dos actores sociais e as súas relacións.
Alumnado do Grao de Traballo Social, da Facultade de Educación e Traballo Social do campus de Ourense, está a desenvolver o proxecto Promoción do benestar socioemocional en mulleres privadas de liberdade en colaboración co Centro Penitenciario de Pereiro de Aguiar. Ao longo deste cuadrimestre deseñarán e realizarán diferentes actividades con este colectivo.
A iniciativa enmárcase no proxecto Educa na Diversidade, Transforma a Sociedade, coordinado por María José Vázquez, do Grupo innova_Transdisciplinar da UVigo e profesora da Facultade de Educación e Traballo Social, sendo beneficiario da convocatoria de proxectos de aprendizaxe-servizo da Vicerreitoría de Extensión Universitaria. Conta ademais co apoio da Área de Equidade e Diversidade e a Asociación para a Saúde Emocional na Infancia e na Adolescencia (ASEIA). Na actividade conflúe profesorado de tres materias, María José Vázquez e Ricardo Fandiño, da Materia Xénero, Violencia e Intervención Social (Área Psicoloxía Básica); María Celsa Pédiz, de Epistemoloxía do Traballo Social (Área do Traballo Social) e Katia Rolán, de Avaliación de Programas (Área de Métodos de Investigación Educativa).
Desde finais de xaneiro, a Sala Alterarte, o espazo expositivo do campus de Ourense, acolle a exposición Do, Re, MiRa, Sol, La, Si, unha serie fotográfica realizada polo artista Tono Arias arredor da celebración da rapa das bestas na aldea galega de Sabucedo. Este mes, alumnado do Grao de Educación Primaria, da Facultade de Educación e Traballo Social, converteu en música as súas fotografía realizando unha serie de sonorización inspiradas nas imaxes expostas.
A iniciativa xurdiu no marco da materia Expresión Musical e a súa Didáctica e coa coordinación das profesoras Lucía Casal e Helena Pardo, e deu continuidade a outra actividade similar realizada anteriormente noutra exposición da Sala Alterarte, A familia e outras aves, de Javier e Jorge Varela. A proposta feita ao alumnado foi que traballasen, en grupo, os sons que a propia exposición artística lle evocase e elaborasen unha proposta de sonorización xustificada, para finalmente levala a cabo na propia Sala Alterarte. A actividade quixo amosar ao alumnado como “pór en valor os recursos da contorna, como poden ser as exposicións artísticas, para sacarlle proveito didáctico, algo que o futuro profesorado de Primaria deberá ser quen de implementar para desenvolver tanto a súa creatividade coma a do seu futuro alumnado, así como para promover a imaxinación e unha educación máis conectada cos espazos próximos”, tal e como sinalou a profesora Lucía Casal.
Despois de varios meses de traballo e cunha valoración moi positiva, acaba de rematar o desenvolvemento dun proxecto que permitiu a alumnado do Grao de Educación Infantil do campus de Ourense achegar este curso académico a música a 21 centros educativos e escolas infantís da xeografía galega.
A iniciativa xurdiu no marco da materia Expresión Musical e a súa Didáctica, impartida e coordinada pola profesora Lucía Casal na Facultade de Educación e Traballo Social, e estivo coordinada desde a Área de Didáctica da Expresión Musical. Con ela deuse continuidade a proxectos anteriores desenvolvidos na mesma liña e coordinados pola mesma docente, como o proxecto de aprendizaxe-servizo MúsiCA(c)TIVA, celebrado o pasado curso académico. Nesta ocasión, o futuro profesorado de Educación Infantil centrouse na realización de secuencias didácticas interdisciplinares e sesións de música en centros educativos nos que se imparte o segundo ciclo de Educación Infantil (de tres-seis anos) así como en escolas infantís (para bebés de 0 a 3 anos de idade).
Investigadoras da Facultade de Educación e Traballo Social, do grupo HC1 e de Ecobas participan este mércores e xoves en Limoges (Francia) na xuntanza de socios do proxecto europeo RuralSilverHubS. A iniciativa ten como obxectivo promover a economía prateada rural a través da innovación social, dixital e emprendedora. Nestes dous días de actividade traballarán na coordinación e no avance do desenvolvemento do proxecto, que dispón dun orzamento de 1,2 millóns de euros para abordar tres retos comúns no espazo Sudoe: o envellecemento, o despoboamento rural e a limitación no acceso a determinados servizos no rural.
RuralSilverHubS Mellora da calidade de vida en áreas rurais impulsando a economía social na silver economy arrancou en 2025, dura tres anos e está financiado pola 2ª convocatoria Sudoe 2021-2027, do Programa Interreg e o Fondo Europeo de Desenvolvemento Rexional (Feder) da Unión Europea. Liderado pola Diputació de Tarragona, conta cun consorcio formado por 19 entidades de Francia, Portugal e España no que destaca a presencia de administracións públicas e entidades expertas en desenvolvemento territorial e no que a representación galega inclúe ademais da Universidade de Vigo á Axencia Galega de Desenvolvemento Rural. A participación da UVigo está encabezada por Maribel Doval, do grupo de investigación Historia Contemporánea 1 e da Facultade de Educación e Traballo Social, e Raquel Arévalo, do grupo de Investigación en Economía, Enerxía e Medio Ambiente Rede e da Facultade de Ciencias Económicas e Empresariais.
Unha plataforma dixital inclusiva deseñada para que persoas con diversidade intelectual poidan acceder a oportunidades de emprego a través da realización de microtarefas dixitais e servizos en remoto. Esta é a proposta de EmpowerTasks, un proxecto que está a ser desenvolvido por varios grupos de investigación da Universidade de Vigo.
A iniciativa, que ten unha duración dun ano, foi unha das propostas gañadoras da IX Convocatoria de Axudas a Proxectos de Investigación en Tecnoloxías Accesibles realizada por Indra Group e Fundación Universia. Dirixida a grupos de investigación, centros universitarios e escolas de negocio adscritos a universidades españolas, esta convocatoria ten como obxectivo promover o desenvolvemento de tecnoloxías innovadoras que melloren a calidade de vida das persoas con discapacidade, facilitando a súa inclusión social e laboral. A axuda acada por EmpowerTasks ascende a 25.000 euros, con parte de financiamento para unha entidade colaboradora no proxecto, que é Down Galicia.